<Dialect:Leeg> <Speed:0.9>
Picture\Plant\Bamboo.jpg
Xyoob

Xyoob yog 1 hom nroj kws hlaav hab luj sai tshaajPlawg, hab nwg muoj cov cos lug kem cov yaag. Nyob huv nruob nrog ntawm txhuo lub cos muoj 1 dlaim npluog tuob lug kem 2 yaag loos nkaus, hab cov yaag khoob qhov.

Nyob ruo tej lub tebChaws, tuobNeeg muob xyoob lug uo twjTaig, dlav, laugCaam, hab ntau yaam siv nyob ruo huv vaajTse.

Muoj ntau hom xyoob nyob ruo tebChaws LosTsuos, tuobSis kuv tsuos pav txug hom kws kuv tau pum hab tau siv xwb.
RawsLe kev pum yaav taag lug, txhuo yim ntawm cov tuobNeeg nyob koom zog tau siv xyoob coj lug uo vaajTsev hab cuobYeej ntau yaam ruo nyag lub neej.

Xyoob tuomTswm (Moob Dlawb hu uo xyoob puajTswm) yog 1 hom xyoob yau zog xyoob ntxhw kws nov luos pav.  Yug coj hom xyoob nuov lug uo vuog vuv tsev, ntsaa tsev, ntsaa laajKaab, tsaavPuob puo txaaj hab puo tsev tsaavLawj, cav dlej, ntsa vuog, dlaab ntxuov muog, raaj ntim dlej hab ntim khoom noj, khob, taig, dlav, qhaub neev, xub neev hab ntxaij xub, paas dlig nav, ntawv, xyaab, kawm, suobCib, choo, tshaus, vaab, hab lwm yaam.

Xyoob raaj mov yog 1 hom xyoob kws nyob ruo huv nruob nrog ntawm txhuo yaag muoj 1 dlaim npluog ntawv nyag quos ntsais. Cov xyoob nuov yog cov kws yug muob txav lug uo raaj ntim mov hab ntim nqaj.  Thaum yug yuov noj, yug muob lub raaj hlawv hab ci ntawm lub qhovCub kuos sav, tes yug maamLe noj. Cov mov losSis cov nqaj tsi kum lub raaj vim tas nwg muoj dlaim npluog ntawv. Nwg muoj 1 tug ntxhab tsw ntxim qaab kawg le.

Xyoob qeeg yog 1 hom xyoob kws raug muob coj lug uo ntiv qeej, raaj tshuob, ntsaa vaaj, paas nuv ntseg, phom npluob, muob phuo uo qhab nplooj kumYem lug vuv tsev.

Xyoob rawm yog 1 hom xyoob kws muob muv hlau hlawv kuos lab hab laum txhuo lub cos kuos to qhov, tes muob siv nqug cawv xaws haus, uo paas nuv ntseg, hab kawm, hab tawb cuob ntseg, hab lwm yaam.

Xyoob cos dlev yog 1 hom xyoob kws muoj cov pob cos luj tsemTsawv le dlev cov cos teg, muoj tej yaag ntev, hab khoob qhov mivAiv. Cov pob cos uo ruo nwg nkhaus le cov muosTxhov hab nwg uo maab le kavTheej. Feem ntau, yug muob coj lug phuo uo ncau khi hab paav vaajTse vim tas nwg zooj le tej maab hab kavTheej.

Xyoob ntxheb yog 1 hom xyoob kws luj tsi heev.  Yug muob paamThawj losSis qws ntoo lug tsoo kuos tawg hab ntsoog taag, tes yug muob hab uo phawv ntim qoobLoos, ntaig xov tsev, hab lwm yaam.

Xyoob txaig yog 1 hom xyoob luj le xyoob ntxheb hab nwg muoj tej kaab txaij rovNtsug.  Cov xyoob txaig nuov kuj muoj ntau hom xwsLe cov txaij dlawb, dlaaj, hab xavNkaaj.  Yug muob coj lug hab uo phawv ntim qoobLoos, ntaig xov tsev, hab lwm yaam.

CeevFaaj
DluoLe, muob cov xyoob laug coj lug siv, muoj tej hom ntsuog xyoob kws noj tau, tuobSis muoj tej hom kws yug noj ntau, tes yug yuov thojPlaab hab ntuov, hab nwg yuov lom yug tuog taug los kuj muoj. Yog yug tsi paub tseeb, tes xum tsi xob noj zoo dluo.
