/*****************************
Author: Kong Xiong
Date compiled: 9/20/2020
Date revised: 3/20/2024
Date recorded: 3/20/2024
******************************/
<Dialect:Leeg> <Speed:1.0> <Pitch:.95>
Picture\other\copper.jpg
Tooj Lab Tuo Tau KaabMob

KeebKwm
Yaav taag lug txug naj nub taamSim nuov, tseem muoj tej tug tuobNeeg kws coj cov paug teg, paug taw hab paug xauv kws yog muob tooj lab losSis tooj dlaag lug uo.
Cov paug nuov kuj muoj ntau hom xwsLe tej lub yog muob ntau txuj xuv tooj kheej lug sis ntswj uoKe huos muoj lwm cov yog muob tej dlaim tooj lug ntaus.

Picture\other\CopperNeckLace.jpg
Peb Mob cov quosLaug tau has tas kev coj cov paug tooj nuov yog uo kev thaiv kaabMob, dlaab, zaaj hab ntau yaam.
50 tawm xyoo dlhau lug hab nyob tebChaws LosTsuos, kuv los kuj tau coj cov paug nuov.

Picture\other\copperBracelet.jpg
Kev coj cov paug nuov yuov uo tej kaab ntsuob tsemTsawv lug tsuos yug txhais npaab, txhais kaav hlaub losSis lub cejDlaab.
RawsLe kev tshawb pum nyob huv internet, puob tau has tas nwg yuov tsi uo le caag ruo yug; yog yug tsi nyam tsuos, tes yug muob ntxuov tawm.

Picture\other\CopperInstrument.jpg
Kev tshawb pum
RawsLe kev tshawb pum nyob ruo huv internet, tuobNeeg tau muob tooj lab, hab tooj lab xyaw zinc kws hu uo tooj dlaag coj lug uo nplhaib, qhwsNtsej, saw cejDlaab, saw teg, qhws, laujKaub, yag, ntaaj, yuomSij, pob qhov rooj, raaj tooj lab, xuv tooj, ncaas, nplaim raaj hab ntau yaam siv.

Picture\other\CopperCookware.jpg
Has txug cov cuobYeej uo noj hab uo haus, puob tau muob lwm hom hlau lug plooj hab tshooj kuos cov tooj lab tsi xob tshwm vim tas yog yug noj losSis haus tooj lab ntau, tes cov tooj yuov lom yug lub cev. DluoLe, puob tau has tas yug tsi xob muob tej cuobYeej tooj lab lug siv ruo txiv lwg suov hab tej yaam qaub vim cov nuov yuov tum kuos cov tooj yaig.
Ntxiv moog, muoj ntau tug tuobNeeg tau ywg tas cov cuobYeej tsuos zoo siv le 6 lub hlis xwb vim tas yog siv ntev, tes yug tej khoom noj yuov kum laujKaub losSis kum yag. Tej tug tuobNeeg nuov tsi pumZoo kuos lwm tug yuov lug siv vim tas kim hab kaav tsi ntev.

XuvXwm
Lub 3/18/2020, Shayla Love tau sau ib tsaab xuvXwm has txug tooj lab tuo tau kaabMob.
Nwg tau has ntau yaam, tuobSis kuv tsuos has mivQuov xwb.
Nwg has tas thaum tej kaabMob poob ruo cov tooj, tes cov tooj nuov tso ib cov chemical hu uo ions lug tuo cov kaabMob.

Nwg tau has tas xyoo 1852, tug Doctor Burq tau moog saib ib lub chaw uo tooj lab kws cov tuobNeeg uo haujLwm siv cuo suv hab chemical lug cais nyob ruo Paris, FaabKis tebChaws.
Nwg xaam pum tas lub thaaj chaw ntawd tsi huv sab, tuobSis cov tuobNeeg tuog tsawg ruo tug kaabMob cholera kws yog haus dlej tsi huv.

Muoj 200 tug tuobNeeg kws tau uo num nyob ruo lub thaaj chaw ntawd puovLeej dlim tug kaabMob cholera kws tau tshwm sim ruo xyoo 1832, 1849, hab 1852. Thaus kws Doctor Burq kawm tau tas 400 txug 500 leej kws tau uo num nyob ruo txuj kev ntawd dlim tug kaabMob cholera, nwg haLe xaus lug tas puob dlim yog yaam num kws puob uo tooj lab kws thaiv tau tug kaabMob kis tau.  Nwg tau soj qaab txug cov tuobNeeg uo num txug tooj lab nyob Paris hab ntau lub nroog thoob qaab ntuj.

Thaum tug kaabMob cholera tawm ruo xyoo 1854 txug 1855, Doctor Burq tsi tau pum kev tuog ruo cov tuobNeeg ntaus nyaj, ntaus kub losSis cov uo thoob rhaub dlej kub txhuo tug kws uo tooj lab. Cov tubRog kws tshuob raaj tooj dlaag xyaw tooj lab los kuj tsi tuog.

Xyoo 1865, tau muoj 6,176 tug tuobNeeg ntawm cov pejXeem 1,677,000 tau tuog ruo tug kaabMob cholera tshwm ruo Paris, tuobSis 30,000 leej kws uo num txug tooj lab tau tuog le 45 leeg xwb.

Nwg tau has ntxiv tas tej khoom siv kws muob tooj lab lug xyaw lwm hom lug uo pob qhov rooj, nqaaj teg, hab ntau yaam kuj tuo tau kaabMob.  

Kawg nuov, kuv tsi kaam leeg tas cov lug kws tau has taag nuov yuov muoj tseeb le puob has, tes nyag yuov siv le caag los nyob ntawm nyag tugKheej.

Uo tsaug ruo mej txhuo tug kws tau lug saib hab noog. Peb maamLe sis ntsib dluo lwm zag.
